ስምምዕ ኣልጀርስ ተግባራዊ ክኸውን፣ ቅልውላው ኢትዮጵያ ንምፍታሕ ዓቢ ተራ ኣለዎ ክብል ሕብረት ኤውሮጳ ገሊጹ

ኣብ መንጎ ኤርትራን ኢትዮጵያን ኣብ ኣልጀርስ ዝተፈረመ ስምምዕ ሰላም፣ ተግባራዊ ክኸውን፣ ነዚ ናይ ሕጂ ቅልውላው ኢትዮጵያ ንምፍታሕ ዓቢ ተራ ኣለዎ ክብል ሕብረት ኤውሮጳ ገሊጹ።ቆንስል’ቲ ሕብረት ብ22 ታሕሳስ ኣብ ዘውጸኦ መግለጺ፣ ስምምዕ ኣልጀርስ 2000 ኣብ ወረቐት ደኣምበር ክሳብ’ዚ እዋን’ዚ ኣብ ባይታ ዘይተተግበረ ብምዃኑ፣ ዶባዊ ክሊ ኢትዮጵያ ንጹር ንኸይከውን ዓንቂጹዎ ኣሎ ኢሉ።

ኣብ መንጎ ቀዳማይ ሚኒስተር ኢትዮጵያን ፕረዚደንት ኢሰያስን ኣብ 2018 ዝተገብረ ስምምዕ ሰላም፣ ኢትዮጵያ ንስምምዕ ኣልጀርስ ከምዝተቐበለቶ ኣፍሊጣ እያ።

ኣብዚ ኣብ መንጎ ፈደራላዊ መንግስቲ ኢትዮጵያን ሓይልታት ትግራይን ዝግበር ዘሎ ዘተ ንሰላም፣ ‘ኤርትራ ካብ መሬት ትግራይ ትውጻእ’ ዝብል ጠለብ ካብ ሓይልታት ትግራይ ዝቐርበሉ ዘሎ ምኽኒያት፣ ምስቲ ‘ናብ ናይ ቅድሚ 2020 ዓመተ ምህረት ዝነበረ ዶባዊ ክሊ ንመለስ’ ዝብል ጻውዒቶም ከምዝተሓሓዝ፣ ስሞም ካብ ምግላጽ ዝተቖጠቡ ሰበስልጣን ኢጋድ፣ ንዘ ሪፖርተር ኣብ ዝሃቡዎ ቃል ገሊጾም።

ቆንስል ሕብረት ኤውሮጳ ኣብ መግለጺኡ፣ ‘ምውጻእ ሰራዊት ኤርትራ ካብ ክልል ትግራይ ንምዕዋት ዘተ ንስምምዕ ሰላም ኢትዮጵያ ሓጋዚ’ዩ’ ብምባል፣ ኣብ ፕሪቶርያ ኣብ ዝተኻየደ ዘተ ‘ኩሎም ናይ ወጻኢ ሓይልታት ካብ ኢትዮጵያ ክወጹ’ ንዝብል ስምምዕ ኣስሚሩሉ።

‘ኢትዮጵያ፣ ናይ ውሽጥን ወጻኢን ጸጥታኣ ኣኽቢራ ብሰላም እትነብረሉ ኩነታት ምፍጣር፣ ንመላእ ሃገራት ቀርኒ ኣፍሪቃ ረብሓ እዩ’ ዝብል ቆንስል ሕብረት ኤውሮጳ፣ ኩሎም መንግስታት’ቲ ዞባ እወታዊ ተራ ክጻወቱ ጸዊዑ።

====================