ጀጋኑ ተጋደልቲ ዲሞክራሲያዊ ምንቅስቓስ ሓርነት ኩናማ ኤርትራ (ዲምሓኩኤ) ንምንቅስቓሳት ናይቲ ደመኛ ጸላኢ ስርዓት ሸፋቱ ህግደፍ ንምግታእን ንምድኻምን ውድቀቱ ንምቅልጣፍ ክካየድ ዝጸንሐ መጥቃዕቲ ብምቕጻል ሎሚውን ኣብ ልዕሊ ጸላኢ ከቢድ ጽፍዒት ብምውራድ ሰፍ ዘይብል ኪሳራታት ከም ዘውረደ ካብ ቤት ጽሕፈት ወታሃደራዊ ስታፍ ዲምሓኩኤ ዝመጸና ዜና ሓቢሩ፡፡ ኣብዚ ብዕለት 30/06/2012 ልክዕ ሰዓት 8፡00 ናይ ለይቲ ካብ ጎኘ ንባረንቱ ትኸይድ ዝነበረት ዕሱባት ወታሃደራት እዚ ጨካን ስርዓት ዝጸዓነት ኤነትረ ዝዓይነታ መኪና ብኣርፒጂን ክላሽንን ዝተሰነየ ሃንደበታዊ መጥቃዕቲ ብምኽፋት ንሰለስተ ሓለፍቲ ሰራዊት ከምዝቐተለን ኣብ ልዕሊ ንብረት ጸላኢ ከቢድ ኪሳራ ከም ዘውረደ ተሓቢሩ፡፡

ብተመሳሳሊ ዜና ምዑታት ተጋደልቲ ዲምሓኩኤ ብዕለት 09/07/2012 ለይቲ ሰዓት 8፡00 ካብ ኣቁርደት ተበጊሳ ኣብ መንጎ ዓደርደን ሓጋዝን ትኸይድ ኣብ ልዕሊ ዝነበረት ቶዮታ ዝዓይነታ መኪና ብምጥቃዕ ኪሳራ ከምዘውረደ ተፈሊጡ። ኣብዚ ብዲቢያ ዝተኻየደ ስርሒት ብኣርፒጂን ክላሽንን ዝተሰነየ በርቃዊ መጥቃዕቲ ኣብ ልዕሊ ንብረትን ሰብን ሓይሊ ጸላኢ ከቢድ ኪሳራ ከም ዘውረደ ካብ ጀጋኑ ዝመጸና ዜና ብተወሳኺ ሓቢሩ፡፡

ብመንእሰያት ዝቆመ ውድብ ዲምሓኩኤ ነዚ ዕውት መጥቃዕቲ ኣብ እዋን ኮንፈረንስ መንእሰያት ኤርትራ ኣብ ደብረዘይት (ኢትዮጵያ) ብዓወት ኣብ ዝሰላሰለሉ ዘሎ ዝወሰዶ ብምኻኑ ፍሉይ ይገብሮ፡፡ በዚ ኣጋጣሚ ጀጋኑ ተጋደልቲ ዲምሓኩኤ ንኣኼባ መንእሰይ ኤርትራ ብዓወት ንክዛዘም ዘለዎ ልባዊ ምንዮት ይገልጽ። ኣብዚ ንስርዓት ህግደፍ ካብ ሱሩ ሚሒና ንምድርባይ ኣብ እነካይዶ ዘሎና ሓርነታዊ ቃልሲ ግደ መንእሰይ ኤርትራ ዕዙዝ ከም ሙኻኑ ግብራዊ ክኾኑን ካብኦም ዝድለ ዘበለ ኩሉ ንምብርካት ድሉዋት ክኾኑ ይጽውዕ፡፡ መንእሰይ ኩናማ እዚ ዲክታቶሪያዊ ስርዓት ተኣሊዩ ብሄር ኩናማ ኤርትራን ኩለን ብሄራት ኤርትራን መሰል ርእሰ ውሳኔኦም ብዘይ ምሽርራፍ ክሳብ ዘረጋገጹ እቲ ቃልሲን መጥቃዕቲታትን ክቅጽል ሙኻኑን ነዚ ኣብዚ እዋንዚ ተበራቢሩ ዘሎ መንእሰይ ኤርትራ ዝሓዝካ ሒዝካ ኣርክብ ይብሎም።