ጀርመን፡ ዝተረኽበ ሽክና ርእሲ ናይታ ጓል 32 ዓመት ኤርትራዊት ምዃኑ ተረጋጊጹ

ፖሊስ ሃገን፡ እቲ ሽክና ምስተረኽበ ነቲ ጉዳይ ዘጻሪ ሓደ ጉጅለ መርመርቲ ኣቚሙ ክከታተሎ ከምዝጸንሐ ኣፍሊጡ ነይሩ።

"ንቕትለት ጓል 32 ዓመት ኤርትራዊት ጓልኣንስተይቲ ዝምልከት መርመራ ብፖሊስ'ዩ ዝካየድ ዘሎ" ብምባል፡ ውጽኢት ናይቲ ዝካየድ ዘሎ [መርመራ] ብጋዜጣዊ መግለጺ ክሕበር ምዃኑ ቃል ኣትዩ ነይሩ።

እቲ ርእሲ ኣብ ከባቢ ከተማ ኦልፐ ኣብ ዝርከብ ቨልደን ዝተባህለ ቦታ'ዩ ጓሓፍ ክእክቡ ብዝተፋወሩ ክልተ ሰባት ተረኺቡ።

እታ ጓል 32 ዓመት ኤርትራዊት ኣደ ዕሸል፡ ኣብ መወዳእታ 2025 ከምዝተቐትለት ይዝከር።

መጠንቀቕታ፡ እዚ ዛንታ ከስካሕክሕ ዝኽእል ትሕዝቶ ኣለዎ፡

ብ17 ሕዳር 2025 ፈላማ ዝተቖረጸ ኣእዳው ናይታ ኤርትራዊት ሓታቲት ዑቕባ ኣብ ደረት ጽርግያ ተረኺቡ። በቲ መስመር እትዝውር ዝነበረት ሰበይቲ ዘይንቡር ነገር ድሕሪ ምርኣያ ንፖሊስ ብምሕባራ'ዩ ኣእዳው ሰብ ምዃኑ ተፈሊጡ።

እቲ ኣካላት ኣብቲ ኤይ-45 ተባሂሉ ዝጽዋዕ መስመር ጽርግያ ድሕሪ ምርካቡ ብዝተገብረ መርመራ ኣሰር ኣጻብዕቲ፡ ናይታ ጓል 32 ዓመት ዝነበረት ግዳይ ምዃኑ ተረጋጊጹ።

ናይ ሰለስተ ወርሒ ዕሸል ውላዳ ድማ ኣብ ኣፍደገ ሓደ ደብሪ ኦርቶክሳዊት ቤተክርስትያን ኣብ ዓረብያ ህጻናት ተገዲፉ ጸኒሑ። ብኸመይ ናብ ኣፍደገ እቲ ደብሪ ከምዝተወስደ ዛጊት ዝተፈልጠ የለን። ኣብዚ እዋን'ዚ እቲ ህጻን ኣብ መዕቆቢ ቆልዑ ይእለ ከምዘሎ ይግለጽ።

ብ28 ሕዳር ከኣ ርእሲን ኣእዳውን ዘይብሉ ሬሳ ናይታ ግዳይ 100 ኪሜ ርሒቑ ኣብ ዘሎ ካልእ ቦታ ተረኺቡ።

ኣብ ፈለማ ናይዚ ዓመት፡ ብዙሓት ኤርትራውያንን ጀርመናውያንን ኣብ ዝተረኽብሉ ኣብ ፍራንክፈርት ናይ ስንብታ ስነስርዓት ዝኽሪ ከም ዝተኻየደላ ዳብሊው-ዲ-ኣር ዝተባህለ መንግስታዊ ማዕከን ዜና ሓቢሩ ነይሩ።

እዚ ፍጻመ፡ ኣብ ኤርትራውያን ተቐማጦ ጀርመን ስንባደን ስግኣትን ፈጢሩ ዝጸንሐ ኮይኑ፡ ብዙሕ ዘይተመለሰ ሕቶታት ዘለዎ'ዩ።

ሰብመዚ እቲ ከባቢ ንነዊሕ እዋን ብዛዕባ እቲ ጉዳይ "ዝተሓላለኸ" መርመራ ከካይዱ ምጽንሖም ይፍለጥ።

"ብቐዳም [11 ሚያዝያ] ኣብ ጥቓ እቲ ኤ45 ተባሂሉ ዝጽዋዕ ዓቢ መስመር ጽርግያ ጓሓፍ ንምእራይ ኣብ ዝተገብረ ወፍሪ፡ ክልተ ሰባት ሓደ ናይ ጓሓፍ ጐማ ረኺቦም። ኣብ ውሽጡ ሽክና ርእሲ ሰብ ጺኒሕዎም።

ብ24 ሚያዝያ ድማ እቲ ሽክና ናይታ ኣካላታ ተቖራሪጹ ኣብ በበይኑ ግዜን ቦታን ዝተረኽበ ስደተኛ ምዃኑ ተረጋጊጹ።