ኤርትራ፡ ኵነታት ትምህርትን ሽመት ሓዳስ ምኒስተርን

እዛ ሕጂ መዝነት ምኒስትሪ ትምህርቲ ከም ዝተዋህበት እትግለጽ ዘላ ዶ/ር ሓሊማ፡ ከምቲ ኣወሃሃዲት ውድብ ሕቡራት ሃገራት ኣብ ኤርትራ ናህላ ቫልጂ ዝገለጸቶን ናይ ቀረባ ፈለጥታ ዘዘንትውዎን፡ ነዊሕ ዓመታት ኣብ ጽላት ትምህርቲ ክትሰርሕ ጸኒሓ እያ።

እታ ዕባይ ቤት ትምህርቲ ሰውራ ኤርትራ ምዃና ዝንገረላ ሓሊማ፡ ፈላሚ ሞያኣ ምምህርና እዩ፤ ዝቐጸለ ኣገልግሎታ እውን ኵሉ ምስ ትምህርቲ ዝተኣሳሰር እዩ።

ኣብ መሰልጠኒ መማህራን ኣስመራ፡ ከም መምህር ቋንቋ እንግሊዝኛ፡ ሓላፊት ክፍሊን ኣካዳምያዊ ዲንን፡ ሓላፊት ጨንፈር ምዘና ሃገራዊ መርመራ፡ ኣብ ክፍሊ ካሪክለም ኣብ ምድላው መምሃሪ መጻሕፍቲ ቋንቋ እንግሊዝኛን ክኢላ ቋንቋን፣ ኣብ ዞባ ማእከል ሓላፊት ጨንፈር ትምህርቲ ዝኣመሰሉ ምስ ትምህርቲ ዝተኣሳሰሩ ሓላፍነታት ሰሪሓ እያ።

ብዓልቲ ሓዳርን ኣደ ኣርባዕተ ውሉዳትን ዝዀነት ወ/ሮ ሓሊማ፡ ጐድኒ ጐድኒ'ዚ ሓላፍነታታት ስራሕን ሓዳርን ድማ ካብ ዩኒቨርሲቲ ኣስመራ ቀዳማይ ዲግሪ ብዓውዲ ኣካውንቲንግ ክትምረቕ እንከላ፡ ኣብ ኣብ ዓዲ እንግሊዝ ብስነቋንቋ ማስተርስ ኣጽኒዓ፣ ዶክተራል ዲግሪ ድማ ኣብ ዩኒቨርሲቲ ኣሕፋዝ - ሱዳን ተማሂራ፤ "ፖሊሲ ቋንቋ ኣብ ትምህርቲ" ዝብል መጽናዕቲ ከም ዘካየደት ከኣ ይፍለጥ።

እዚ ከም ዝደኸመ ዝግለጽ ዘሎ ስርዓተ ትምህርቲ ኤርትራ፡ "እንታይ ለውጢ ከተምጽኣሉ ትኸውን?" ዝብል ሕቶ ምላሹ ምስ ግዜ ዝርአ ኰይኑ፡ ሓሊማ ቅድሚ 6 ዓመት ምስ ኣገልግሎት ተለቪዥን ኤርትራ ኣብ ዘካየደቶ ቃለመሕትት፡ "ኣብ ኤርትራ ገና ዘይሰራሕናሉ ዓውዲ፡ መምህራን ናይ ምስልጣን ዓቕሚ ገና ከምቲ ኣነ ዝሓልሞ ኣይኰነን ዘሎ፤ እዚ ናይ ብሓቂ ቦታኡ ክሕዝ፡ ኣነ ከኣ ኣበርክቶይ ክገብር እሓስብ፡" ኢላ ምንባራ ይዝከር።

'ኣብ መጻኢ እንታይ ክትገብር ከም እትደሊ' ኣብ ዝተሓተተትሉ'ውን፡ መምህር ኰይና ብምቕጻል ንብዙሓት መንእሰያት ከተተባብዕ ባህጊ ከም ዘለዋ ገሊጻ ነይራ።

እታ፡ "ሓደ ሰብ ካብ ዶክተር፡ መምህር ሓሊማ ኢሉ ክጽውዓኒ እንከሎ እዩ ክብሪ ዝስምዓኒ፡" ክትብል ንምምህርና ዘለዋ ፍቕሪ እትገልጽ ምኒስተር ትምህርቲ ሓሊማ መሓመድ፡ "ኣብ ኮሌጃትና ብዙሕ ናይ ዓቕሚሰብ ሕጽረት ስለ ዘለና፡ ንህንድን ካልኦት ደቂ ወጻእን ዝግበር ዘሎ ናይ ብሓቂ ብኤርትራውያን ክትካእ ኣለዎ ኢለ ስለ እየ ዝኣምን፣ ኣብ ደረጃ ድሕረ ይዅን ቅድመ ምረቓ ንዘለዉ መንእሰያት ክምህርን ብቑዓት ሰባት ከፍርን እየ ዝሓስብ፡" ክትብል ተዛሪባ።

ብተወሳኺ፡ መጽናዕቲታት ናይ ምክያድ ድሌት ከም ዘለዋ'ውን ገሊጻ ነይራ።

ኣብ ዝሓለፈ ዓመት ኣብ ኣስመራ ንዝተኻየደ ኣህጉራዊ ዋዕላ መጽናዕቲታት ኤርትራ ኣደመንበር ኰይና ብምምራሕ መጽናዕታዊ ወረቕት እውን ኣቕሪባ።