ዘስካሕክሕ ሞት ኤርትራዊት ኣደ ኣብ ጀርመን፡ ዘይተመለሱ ኣገደስቲ ሕቶታት

ጀርመናውያን ክኢላታት መርመራ፡ ንናይ መወዳእታ ሕልፈት ናይታ ኣብ ጫካታት ራይንላንድ-ፓላቲና ኣእዳዋ ተቘሪጹ ዝተረኽበ ጓል 32 ዓመት ኤርትራዊትን ኣብ ኣፍደገ ቤተክርስትያን ዝተረኽበ ውሉዳን ንምፍላጥ፡ ሓበሬታታት ኣብ ምምእራርን ምግጥጣምን ተጸሚዶም ይርከቡ። እቲ ኣእዳው ኣብ ጽርግያ ኤይ-45 ድሕሪ ምርካቡ፡ ዝተወስደ ኣሰር ኣጻብዕቲ ምስ ተመርመረ እዩ ምስታ ኣብ መንበሪ ዕቝባ ቦን ክትነብር ዝጸንሐት ኤርትራዊት ጓለንስተይቲ ተኣሳሲሩ ክግለጽ ጀሚሩ። እዚ ድማ ሰፊሕ ድልያ ናብ ምክያድ ደፊኡ፣ ሰበስልጣን ክሳብ ልዕሊ 100 ኪሎሜተር ዝርሕቀቱ ከባቢ ሞንርያል ብምንቅስቓስ ተፍትሽ ኣካየዱ።

ኣብኡ ድማ ርእስን ኣእዳውን ዘይብሉ ኣካላት ሰብ ረኸቡ።

እቶም ክኢላታት መርመራ፡ እቲ ሬሳ ምስቲ ቅድሚ ሰሙን ዝተረኽበ ኣእዳው ናይ ሓንቲ ሰብ ክኸውን ከም ዝኽእል እኳ እንተ ኣመኑ፡ ምሉእ መንነት ንምፍላጥ ግን ውጽኢት ዲኤንኤ ኣብ ምጽባይ እዮም ዘለዉ።

ገና ርእሲ ግዳይ ኣይተረኽበን፤ ብኸመይ ተቐቲላ፡ ብንቡር ድያ መይታ ወይስ ብጭካነ? መልሲ ዘይረኸበ ሕቶ እዩ።

ነቲ ኵነታት ስንክሳር ዝገብሮ ድማ ቅድሚ እቲ ኣእዳው ዝተረኽበሉ መዓልቲ፡ ኣብ ኣፍደገ ሓደ ገዳም ወዲ ሰለስተ ወርሒ ዕሸል ውላዳ ብህይወት ተረኺቡ። እቲ ህጻን ዝዀነ ጕድኣት ከም ዘይብሉን ኣብ መንግስታዊ ክንክን ከም ዝርከብን ይግለጽ።

ገለ ማዕከናት ዜና ከም ዝሕብሩዎ፡ መጻምድቲ ናይታ ኤርትራዊት ከም ምዃኑ ተኣሚኑሉ ዘሎ ወዲ 42 ዓመት ሰብኣይ ካብ ኤውሮጳ ወጻኢ ኣብ ትሕቲ ቀይዲ ኣትዩ ከም ዘሎ እዩ።