ኤርትራዊ ስደተኛ፡ ካብ ዓዲ እንግሊዝ ናብ ፈረንሳ ከይምለስ ብሕጊ ረቲዑ

ኣኽበርቲ ሕጊ 'ሆም ኦፊስ' ኣብ ፈረንሳ ኰይኑ ዕቝባ ክሓትት ይኽእል ነይሩ'ዩ ክብሉ እንከለዉ፤ ኣብ ፈረንሳ ኣብ ምምላሱ ምድንጓያት እንተተገይሩ እቶም ኣብዚ ሰሙን ናብ ፈረንሳ ክምለሱ ተሓሲቦም ዘለዉ ስደተኛታት'ውን ተመሳሳሊ ምጕት ከምጽኡ ከምዝኽእሉ ሓቢሮም።

እዚ እንተዀይኑ ከኣ ካልኦት ብጃልባ ገይሮም ካብ ፈረንሳ ናብ ዓዲ እንግሊዝ ንኽመጽኡ ዘተባብዕ ምዃኑ እቶም ኣኽበርቲ ሕጊ ገሊጾም።

ቤት ጽሕፈት ውሽጣዊ ጉዳያት፡ ነቲ ግዳይ ዘመናዊ ጊላነት ክኸውን ይኽእል ዝብል ነጥቢ ክነጽጎ እንከሎ፡ ትማሊ ኣብ ዝጽሓፍዎ ደብዳበ ከኣ ጉዳዩ ብውክልና ክከታተሎ ከምዝኽእል ገሊጾም። እንተዀነ ጉዳዩ ኣብ ፈረንሳ ኰይኑ ይከታተሎ ዝብል ሓሳብ'ውን ኣየቐመጡን።

ነቲ ናብ ፈረንሳ እንተተመሊሱ ነዳይን ግዳም ሓደርን ክኸውን'ዩ ዝብል ጥርዓን እቲ ኤርትራዊ ስደተኛ ዝነጸገ ጁስቲስ ሸልዶን፡ እዚ ዘሎ ምጕት ግን ዋላ ንግዚኡ ይዅኹን ናብ ፈረንሳ ከይምለስ ይሕግዞ'ዩ ኢሉ።

"ኣብዚ ምስ ምስግጋር ደቂ ሰባት ተታሓሒዙ ዓቢ ነገር'ዩ ዝልዓል ዘሎ፣ ኣብዚ ከኣ እቲ ሆም ኦፊስ እኹል ምጽራያት ገይሩ ድዩ ኣይገበረን ምፍላይ የድሊ፡ እዚ ሰብ ካብ ፈረንሳ ናብዚ ይዅን ካብ ካልእ ናብ ፈረንሳ ብዘይ ድሌቱ ወይ ብድፍኢት ኣሰጋገርቲ ደቂ ሰባት ሰጊሩ እንተዀይኑ ዋላ ንሓጺር ግዜ ይዅን ኣብዚ ኰይኑ ክካታዕ ኣለዎ" ይብል።

ዳኛ እቲ ቤት ፍርዲ፡ ጠበቓ እቲ ኤርትራዊ ስደተኛ ኣብ ዝመጽእ 14 መዓልታት ኵሉ መርትዖታት ሒዙ ክቐርብ ብድሕሪኡ ጉዳዩ መዓልቦ ክግበረሉ ቈጸራ ሂቡ ኣሎ።

ወሃቢ ቃል ክፍሊ ውሽጣዊ ጉዳያት ንቢቢሲ ኣብ ዝሃቦ ቃል፡ መንግስቲ ዓዲ እንግሊዝ እቲ ቀዳማይ መስርሕ ምምላስ ናብ ፈረንሳ ብቕጽበት ክካየድ ከምዘድልዮ ኣብሪሁ።

ኣባል ባይቶ እታ ሃገር ዝዀነት ከሚ ባደኖች ምስ ማዕከን ዜና ኤልቢሲ ኣብ ዝገበረቶ ቃለ መሕትት "ብመሰረቱ ንሃገርና ዓዲ ስደተኛታት ኢና ንገበራ ዘለና፣ ዋላ እቶም ኣብ ካልእ ሃገራት ቅሩብ ሓጐስ ዝጐደሎም ሰባት ናብዛ ሃገር'ዮም ክመጽኡ" ኢላ።

ሓላፊት ጽገናዊ ሰልፊ ኒገል ፈራነግ ብወገና፡ እዚ 'ዋን ኢን ዋን ኣውት' ዝብል ፖሊሲ ቍጽሪ ስደተኛታት ዘነኪ ፖሊሲ ከምዘይኰነ'ያ ትማጐት።

እቲ ብሕጋዊ ምኽንያታት ስሙ ክግለጽ ዘይተደለየ ኤርትራዊ ስደተኛ፡ ቅድሚ ክልተ ዓመታት ካብ ኢትዮጵያ ናብ ኣውሮጳ ኢሉ ተበጊሱ ኣብ ምያዝያ 2025'ዩ ናብ ዓዲ ጣልያን ኣትዩ።

ድሕሪ ሓደ ወርሒ ከኣ ናብ ፈረንሳ ኣትዩ ብቀይሕ መስቀል ዝርከቦም ትካላት ግብረ ሰናይ ሓገዛት ተገይሩሉ።

ኣደኡ 1400 ዶላር ከፊላትሉ ከኣ ካብ ፈረንሳ ተበጊሱ ንመትረብ ዓዲ እንግሊዝ ኣቋሪጹ ብጃልባ ናብ ዓዲ እንግሊዝ ከምዘኣተወ ናብ ቤት ፍርዲ ዝቐረቡ ሰነዳት የረድኡ።