መንግስቲ ኤርትራ ንመራሕቲ 'ብልጽግና' ዝሃቦ ግብረመልሲ

ብወገን መራሒ ኢትዮጵያ ኣብ ዝሓለፈ ክልተ ዓመታት ክወሃብ ዝጸንሐ መግለጺታትን ኣፍደገ ባሕሪ ምርካብ 'ናይ ልኡላውነት ጉዳይ' ኮይኑ ምቕራቡ ናብ ሓድሽ ግጭትን ዞባዊ ዘይምርግጋእን ከየምርሕ ስግኣት ፈጢሩ ይርከብ።

"ናትና ኣይንህብን፥ ዘይናትና ኣይንደልን" ንዝብል ናይ ቅድሚ ርብዒ ክፍለዘመን መግለጺ ፕረዚደንት ኢሳይያስ ኣፈወርቂ ዘዘኻኸረ እቲ ሚኒስተር፡ ሃገሩ ብምዕባለ ጎረቤታ ከምዘይትቐንእ'ዩ ዝምጉት።

ኣብዚ ቀረባ እዋን፡ ሓይልታት ኤርትራ ኣብ ክልል ትግራይ ዝርከብ ልኡላዊ መሬት ኢትዮጵያ ሒዞም ከምዘለዉ ሰብመዚ ኣዲስ ኣበባ ክኸሱ ምጽንሖም ይዝከር።

ኤርትራ ግን ሰራዊታ ድሕሪ ኲናት ትግራይ ናብ ልኡላዊ መሬቱ ከምዝሰሓበ ብምምጓት ነቲ ክስታት ክትነጽጎ'ያ ጸኒሓ።

ፕረዚደንት ኤርትራ ኢሳይያስ ኣፍወርቂ፡ ኣብዚ ቀረባ እዋን ምስ ሃገራዊ ተለቪዥን ኤርትራ ኣብ ዝገበሮ ቃለመሕትት፡ ኢትዮጵያ መዓልታዊ ኣብ ምፍርራሕን ዕድጊ ኣጽዋርን ከም እተጸመደት ከሲሱ ምንባሩ ይዝከር።

ድሕሪ ስምምዕ ፕሪቶርያ ኣብ ዝተፈጥረ ምግልባጥ ዝምድናታት፡ ህወሓት ምስ ኤርትራ ርክብ ምግባሩ ብፈደራላዊ መንግስቲ ኢትዮጵያ ብዓይኒ ጥርጣረ'ዩ ዝርአ።

መራሒ ህወሓት ዶ/ር ደብረጽዮን ገብረሚካኤል ብዓርቢ ኣብ ዝሃቦ ጋዜጣዊ መብርሂ "ንሕና ምስ ኵሎም ጐረባብትና ሰላም ኢና ንደሊ፣ ዶባትና ዶብ ሰላም ክዀኑ እዩ ባህግና። ይዅን'ምበር እቲ ርክብ ልኡላዊ መሬት ትግራይ ብዘኽብር ክኸውን ኣለዎ" ክብል ተሰሚዑ ነይሩ።

"ናይ ትግራይ ምስ ኤርትራ ምርኻብ ንዂናት መወልዒ ምኽንያት ክኸውን ኣይክእልን፤ 'እታ ኣብኣ ዘላ ርክብ' እናተባህለት ብዅሉ ዋላ ብዲፕሎማት ይመጸና እዩ፤ ተራኺቦም ዝጨፍጨፉና 'ጄኖሳይድ' ዝፈጸሙልና ንሳቶም፤ ንሕና ግን ሰላም ኢና ንብል ዘለና፤ እቲ ካልእ ጉዳይ ከኣ ብስርዓት ይረአ፤ ሽርሒ የብላ፡ ተንኰል የብላ"።

"ዓፋር ምስ ናይ ኤርትራ ዓፋር ምስ ናይ ጅቡቲ እንተ ተራኺቦም ኲናት ምድላይ ማለት ድዩ?" ክብል ዶ/ር ደብረጽዮን ይምጕት።