ኣብ ልዕሊ ሰራዊት ኤርትራ ዝወጸ ሓድሽ ጸብጻብ እንታይ ይብል?

እቲ ጸብጻብ፡ ቅድሚ ክልተ ዓመት ኣብ ክልል ትግራይ ኣብ ዝተኻየደ ደማዊ ኲናት ሓድሕድ ዝተፈጸመ ግፍዕታት ብዝርዝር ኣስፊሩ ኣሎ።

ሰራዊት ኤርትራ ኣብቲ ደማዊ ውግእ ንፈደራል መንግስቲ ደጊፉ ዝተሳተፈ ዀይኑ፡ ብኣማኢት ኣሽሓት ዝቝጸሩ ሰለማውያን ሰባት ከምዝተቐትሉ ሕብረት ኣፍሪቃ ኣፍሊጡ ነይሩ።

ኣብ ርእሲኡ፡ ስቅያትን ጭውያን፡ ዘይሕጋዊ ምስግጋር ወርቂ፡ ጥንታዊ ንብረትን ደቂ ሰባትን ከም ዝተፈጸመ'ውን እቲ ጸብጻብ ኣስፊሩ'ሎ።

መራሕቲ ኤርትራ ኣብ ምውጣን እቲ ኲናት ንጡፍ ተራ ከምዝተጻወቱ፡ ግጭት ቅድሚ ምውልዑ ነቲ ኲናት ብምትላምን " ንትግራይን ህወሓትን ንምቕጻዕን ሰሪሖም" ድማ ይብል።

እቲ ጸብጻብ፡ ብዙሓት ተዓዘብትን ተሓለቕቲ ሰብኣዊ መሰላትን ብምጥቃስ፡ 'ምጽናት ዓሌት' ተፈጺሙ ክኸውን ከምዝኽእል፡ እንታይነትን ስፍሓትን ናይቲ ዝተፈጸመ ግፍዕታት ዘጕልሕ እዩ።

ጸብጻብ ዘ ሴንትሪ፡ ኵሎም ኣብቲ ኲናት ዝተሳተፉ ወገናት ገበናት ኲናት ከም ዝፈጸሙ ይኸስስ።

ሓይልታት ምክልኻል ኤርትራ፡ ኣብ መወዳእታ 2020 ክሳብ መጀመርታ 2021 ኣብ መላእ ትግራይ ኣብ ሰፊሕ ስርቅን ቍጠባዊ ዕንወትን ተሳቲፉ ምንባሩ ይሕብር።

እዚ ዕንወት ብኣጋጣሚ ከምዘይነበረን፡ ሃብቲ ንምውጻእን ንነዊሕ እዋን ዝጸንሕ ቍጠባዊ ጉድኣት ንምውራድን ብውጥን ዝተሰርሐ ከምዝዀነ ድማ ይኸስስ።

መንግስቲ ኤርትራ፡ ኣብ ኲናት ትግራይ ዝነበሮም ተሳትፎ ጸኒሑ ዝኣመነ ዀይኑ፡ ኣብ ልዕሊ ሰራዊቱ ንዝቐርቡ ክስታት ገበናት ኲናት፡ ጃምላዊ ቅትለታትን ዘመተን ይነጽግ።

ምኒስተር የማነ፡ እዚ ኣብዚ እዋን ዝወጽእ ዘሎ ጸብጻብታት፡ ዝደጋገምን በተን ምወላ ትካላት ምዕራብ ዘለወን ማዕከናት ዝግበር ዳግመ-ምስራሕን ምግዋሕን ምዃኑ ብምግላጽ ኣብ ኤክስ ምላሽ ሂቡሉ።

እዋናዊ ኵነታት

ኣብ ቀረባ እዋናት፡ ኣብ ከባቢ ዶባት ኤርትራን ትግራይን ህዝቢ ንህዝቢ ርክባት ንምድንፋዕ ምንቅስቓስታት ዝግበር ዘሎ ኰይኑ፡ሰራዊት ኤርትራ ካብቶም ድሕሪ እቲ ኲናትሒዙዎም ተባሂሉ ዝኽሰሰሎም ከባቢታት ምሉእ ብምሉእ ከምዝለቐቐ ግን ምርግጋጽ ኣይተኽኣለን።

ሕጂ'ውን ኣብ ትግራይ ዘሎ ኵነታት ዘስግእ ከምዝዀነ፡ዝገልጽ እቲ ሓድሽ ጸብጻብ፡ ባይቶ ጸጥታ ሕቡራት ሃገራት፡ ብዕሊ ኣብ ዘይተተግበረ ውሳነ ዶባትን ኢትዮ- ኤርትራን ከምኡ'ውን ዝዕንቀፍ ዘሎ ውዕል ሰላም ፕሪቶርያ ኣመልኪቱ ግቡእ መርመራ ክገብርን ውሳነ ከሕልፍን ጸዊዑ።

ከምኡ'ውን፡ ሕብረት ኣውሮጳ ሓዊሱ፡ ኣመሪካ፡ እንግሊዝን ፈረንሳን ዝኣመሰላ ሃገራት፡ መንግስቲ ኢትዮጵያ፡ ኤርትራን ህወሓትን ናብ ካልእ ዙር ኲናት ከይምለሱ ከጠንቅቝን ተሪር መልእኽቲ ከሕልፉን ዘ ሴንትሪ ይላቦ።