ኤርትራ፡ 'ኢትዮጵያ ኲናት ንምውላዕ ትደሊ ኣላ' ክትብል ከሲሳ

ነዚ ብዝተፈላለየ መንገዲ ክንጸባረቕ ዝጸንሐ ድሌታት ኢትዮጵያ መሰረት ገይሩ፡ ኣብ ኣስመራ ንዝርከቡ ዲፕሎማሰኛታት ወጻኢ ሃገራት፡ ኣብ መጋቢት እዚ ዓመት መብርሂ ዝሃበ ምኒስተር ጉዳያት ወጻኢ ዑስማን ሳልሕ፡ እቲ ብወገን ኣዲስ ኣበባ ዝቃላሕ ዘሎ፡ "'ብዲፕሎማሲ ይዅን ብወተሃደራዊ ሓይሊ' ኣፍደገ ባሕሪን መዓስከር ሓይሊ ባሕርን ናይ ምርካብ ግጉይ ሸውሃት፡" ክግታእ ጸዊዑ ነይሩ።

በዚ ናይ ሕጂ መግለጺኣ ድማ ኤርትራ፡ እቲ ኣብ ዝሓለፈ ክልተ ዓመታት ክካየድ ዝጸንሐ፡ "ተዂታዂ ተግባራት ንልኡላውነትን ግዝኣታዊ ሓድነትን ኤርትራ ከምኡ'ውን ንዞባዊ ሰላምን ርግኣትን ከቢድ ናይ ሓደጋ ደወል፡" ምዃኑ ኣጠንቂቓ።

ኢትዮጵያ ኣብዚ ቀረባ መዓልታት ነቲ ኣብ መንጎ ክልቲአን ሃገራት ዘሎ ምትፍናን ብዝምልከት ናብ ዝተፈላለዩ ወገናት ዓለም ጥርዓናት ከተቕርብ ከም ዝጸንሐት ጸብጻባት ክሕብሩ ጸኒሖም'ዮም።

ኤርትራ ከም ዝበለቶ፡ እቲ ናብ ዋና-ጸሓፊ ሕቡራት ሃገራት ኣንቶንዮ ጉተረዝን ካልኦት መራሕቲ ሃገራትን ተሰዲዱ ዘሎ መልእኽቲ፡ ንኤርትራ ብ"ተደጋጋሚ ምትዂታዂን ጥሕሰት ልኡላውነትን ግዝኣታዊ ሓድነትን ብሓሶት ዝጥቅንን ዝኸስስን፡" እዩ።

ኣብ ዝሓለፈ ሳምንቲ፡ ኣብ መዋስንቲ ዓድታት ኤርትራን ትግራይን ዝርከቡ ህዝቢታት፡ በቲ "ጽምዶ" ተባሂሉ ዝተሰምየ ምንቅስቓስ ክገብርዎ ዝቐነዩ ርክባትን ምኽፋት ዶባትን፡ ብፍላይ ኣብ መንጎ ክልቲኡ ህዝቢታት ተስፋ ሰላም ሂቡ ከም ዘሎ ዝፍለጥ እዩ።

እንተዀነ፡ እዚ ደገፍ መራሕቲ ኤርትራን ህወሓትን ከም ዘለዎ ዝንገር ርክባት፡ ብማእከላይ መንግስቲ ፈደራል ፖለቲካውን ሕጋውን ሕቶታት ዘልዕል ጉዳይ ኰይኑ ብዙሓት ወገናት ብስክፍታ ክርእይዎ ጸኒሖም እዮም።

ፕረዚደንት ግዝያዊ ምምሕዳር ትግራይ ጀነራል ታደሰ ወረደ፡ ኣብ እዋን ስይመቱ ምስ መንግስቲ ፈደራል ካብ ዝፈረመሎም ሸሞንተ ነጥቢታት እቲ ሓደ፡ ነቲ ኣብ ኣብ ዶብ ክልቲአን ሃገራት ዝግበር ዘይሕጋዊን ዘይስሩዕን ርክባት ዝጠቅስ ምዃኑ ኣይርሳዕን።

እቲ ጀነራል፡ ስልጣን ኣብ ዝሓዘሉ እዋናት፡ ኣብ ከባቢ ዶባት ዘለዉ ታሕተዎት ሰብመዚ ኣብቶም ከባቢታት ምርግጋእ ንምውሓስ ዘይስሩዕ ርክባት ከም ዝግበር ብምጥቃስ፡ ውሱን ሰላማዊ ርክባት ህዝብታት ክልቲኡ ሃገራት ከም ዘሎ'ውን ኣሚቱ ነይሩ።