'ኢትዮጵያ ኲናት ንምውላዕ ትደሊ ኣላ' ክትብል ኤርትራ ከሲሳ

ፕረዚደንት ኢሳይያሰ ኣፍወርቂ ኣብ መበል 34 ዓመት ጽንብል ሃገራዊ ናጽነት ኤርትራ ብዛዕባ ኢትዮጵያ ዝሃቦ መግለጺ ብቐጥታ ንመንግስቲ ኢትዮጵያ ምንቃፉ ይዝከር።

"ንተጻብኦ ህዝብን መንግስትን ኤርትራ ዝፍሓስ ዘሎ ቅሉዕን ስዉርን ሸርሕታትን'ውን ዘይፈለጠ የሎን፣ እንታይ'ዩ እቲ መደምደምታ? ተበጊሱ ዝነበረ ትስፉው ሃንቀውታ በኒኑ'ዩ፡" ብምባል'ዩ እቲ ፕረዚደንት ንዝምድና ክልቲአን ሃገራት ገሊጽዎ።

ኣዛዚ ሰራዊት ኢትዮጵያ ፊልድ ማርሻል ብርሃኑ ጁላ ቅድሚ ሓደ ሰሙን ንፓርላማ ሃገሩ ኣብ ዝሃቡ መብርሂ፡ ዝምድና ኤርትራን ኢትዮጵያን ንምምሕያሽ ዝተገብረ ጻዕርታት ከም ዝፈሸለ ገሊጹ ነይሩ።

ኤርትራ ንሃገሩ ኣፍደገ ባሕራ ክትከፍተላ ድልውቲ ከም ዘይኰነት'ውን ብምግላጽ ድማ ኣብዚ ዞባ ሃወኽቲ ስርዓታት'ውን ኣለዉ። ኵሉ ግዜ ዝርብሹ፡ ውግእ ዝሰብኩ፡ ልምዓትን ውህደትን ዘይፈልጡ፡ ግጭት ሞያ ዝመስሎም መራሕቲ ኣለዉ" ክብል ናብ ፕረዚደንት ኢሳይያስ ዘነጻጸረ ዝመስል መግለጺ ክህብ ተሰሚዑ።

ኣብ ዝሓለፈ ሳምንቲ፡ ኣብቲ ኣብ መንጎ ኤርትራን ምስ ትግራይ ዘዋስን ዶባት ኢትዮጵያን ኣብ መንጎ ማሕበረሰባት ክልቲኡ ህዝብታት ዝተኻየደ ርክባት ናይ ሰላም ተስፋ ወሊዑ ምቕንያ ይፍለጥ።

ሓይልታት ኤርትራ ኲናት ትግራይ ድሕሪ ደው ምባሉ ኣብ ገለ ከባቢታት ኢትዮጵያ (ክልል ትግራይ) ከምዘለዉ ሰብመዚ ኢትዮጵያ ክኸሱ ጸኒሖም'ዮም። እንተኾነ ኤርትራ ብተደጋጋሚ ሰራዊታ ኣብ ልኡላዊ መሬቱ ከምዘሎ ብምፍላጥ ንክስታት ኣዲስ ኣበባ ክትነጽጎ ጸኒሓ።

ኣብዚ ናይ ሎሚ መግለጺ'ውን፡ "ኤርትራ በቲ ብዘይምኹኑይ ምድንጓይ ኢትዮጵያ ድሕሪ ክልተ ዕቑድ ዝተቐበለቶ ውሳነ ብይን ኮሚሽን ዶብ ኤርትራን ኢትዮጵያን ብጽኑዕ ቅይድቲ እያ" ኢላ።