ኣብ ሊብያ ዕጡቓት ሰብ ብረት ኣብ ሕድሕዶም ብዝፈጠርዎ ግጭትን.........

ኣብ ሊብያ ዕጡቓት ሰብ ብረት ኣብ ሕድሕዶም ብዝፈጠርዎ ግጭትን ዝማዕበለ ናይ ተኹሲ ምልውዋጥን ኤርትራውያን ዝርከብዎም ስደተኛታት ግዳይ ከም ዝኾኑ ተገሊጹ። መዓልታዊ ስራሖምን ምንጪ ኣታዊኦምን ኣብ ዘይሕጋዊ ምስግጋር ሰባት ዝገበሩ፡ መንግስቲ ዘይቆጻጸሮም ብዝተፈላለዩ ጉጅለታት ዝተወደቡ ዕጡቓት ሊቢያውያን ኣብ ሕድሕዶም ብዝፈጠርዎ ናይ ተኹሲ ምልውዋት ኣብ ትሕቲኦም ዝነበሩ፡ ኤርትራውያን ዝርከብዎም ስደተኛታት ተሰናቢዶም ክሃድሙ ኣብ ዝፈተንሉ ግዳይ ሞትን መቑሰልትን ከም ዝኾኑ ዝተፈላለያ ማዕከናት ዜና ከቃልሓ ቀኒየን ኣለዋ። ጠንቂ ባእሲ ናይ’ቶም ዕጡቓት በቶም ብጀሆ ዝሓዝዎም መሳኪን ስደተኛታት ዝተበገሰ ከም ዝኾነ፡ ምኽንያት ናተይ’ዮም ናተይ’ባ ብዝብል ከም ዝጀመረ፡ ዕጡቓት ገበኛታት ሊቢያ ብኣሽሓት ዝቑጸሩ ስደተኛታት ኣብ በበይኑ መዳጎኒታት ሒዞም፡ ገንዘብ ከም ዘኽፍሉ፡ ሰባት ከም ዝሸጡ፡ ደቂ ኣንስትዮ ከም ዝዕምጹ ዝገለጻ እተን ማዕከናት ዜና፡ ኣብ ሊብያ ዝርከቡ ስደተኛታት ኣብ ዝኸፍአ ኩነታት ምህላዎምን ኣረጋጊጸን።