ሃገራዊ ሓድነት ኣይኮነን ኣብ ሕብረ ብሄራዊት ሃገር፡ ኣብ ብሄራዊት ሃገርን’ውን ብሓይሊ ኣይረጋገጽን

ሃገር መጸውዕን መለለይን ፍሉይ ካርታ ናይ ዘለዎ መሬታዊ ኣቀማምጣ ወይ ግኡዝ መሬት ጥራሕ ዘይኮነ፡ ብቐንዱ ናይ’ቶም ኣብ ውሽጣ ዝነብሩ ህዝብታት መለለዪ መንነትን መጸውዕን’ዩ። ስለዚ ከኣ ብዛዕባ ሃገራዊ ነጻነት፡ ልኡላውነት ክዝረብ፣ ውጥን ክውጽእ፣ ምምሕዳራዊ ቅርጻ ክዝርጋሕ፣ ኣብ ዜጋታት ሃገራዊ ፍቕሪ ንምስራጽ ብኹሉ መሳርሒ ተጠቒምካ ጎስጓስ ክግበር እንከሎ ንሰብ ማእከል ዝገበረ ክኸውን ከም ዘለዎ ብዙሓት ዝሰማምዕሉ’ዩ። ሓቀኛ ህንጸት ሃገራዊ ሓድነት፡ ብሄራዊ ወይ መበቆላዊ መንነት፣ ታሪኻዊ መንነት፣ ቋንቋዊ መንነት፣ ባህላዊ መንነት፣ ሃይማኖታዊ መንነት፣ፖለቲካዊ ወይ ናይ ኣረኣእያ መንነት፣ ቦታዊ መንነት፣ ሓባራዊ ፍትሓዊ ተጠቃምነት፣ ናይ ነበርቲ ህዝብታት ምሉእ ኣፍልጦ ዝህብ፣ ዘኽብር፣ ነዚ ድማ በረኣእያን ብሕግን ተቐቢሉ ዝትግብር ፖለቲካዊ ምሕደራ ክህሉ ከም ዘለዎ’ዮም ምሁራት ፖለቲካዊ ስነ- ፍልጠት ዝሕብሩ። ዘስተምህሩ።